Covid-19. Tempo de palabras e xestos: a nosa loita interminable e o noso orgullo

05 Abr Covid-19. Tempo de palabras e xestos: a nosa loita interminable e o noso orgullo

Enfrontámonos á cuarta semana de estado de alarma. Días duros, de moitísimo traballo, de incerteza e impotencia, pero tamén de orgullo e xenerosidade. Xornadas nas que as palabras e os xestos nos reconfortan e nos animan a seguir adiante dando o mellor de nós mesmos para atender a pacientes, residentes, usuarios e familias.

Queremos compartir convosco algunhas destas palabras e destes acenos para agradecer o esforzo, a paciencia e a comprensión de todos os que nestes momentos e por diferentes motivos estades vinculados a Hestia Alliance. Comezamos coa carta que profesionais da Residencia Xeriátrica e Centro de Día Sant Lluís lles dedicaron a compañeiros, residentes e familiares da de Es Mercadal, pero que ben podería dedicárselles a todos os profesionais do Grupo.

A nosa loita interminable

Sodes unhas valentes e loitades sen descanso polos nosos maiores e para manter viva a esencia de “coidar”. E é que agora, máis que nunca, entendemos que este traballo é vocacional e ten que gustarche desde o corazón. Son momentos nos que o traballo vai contigo as 24 horas do día e pensas en cada unha das persoas illadas dentro das súas catro paredes. Esas persoas que xa viviron unha vida, pero que tamén forman parte da túa propia vida e agora está nas túas mans axudalas e acompañalas ata o final.

Nós, compañeiras, querémosvos transmitir moita forza. A vós, que velades polos maiores e que coidades desta casa tan grande que é o Xeriátrico de Es Mercadal e que sempre estivo chea de amor e familiaridade. Estamos xuntos nesta causa. Tocouvos a vós loitar primeiro nesta batalla e nós apoiámosvos. Todos somos un!

Estes días hai intres de todo: de medo, de inseguridade, de tristeza, de dó, de pánico, de frustración, de carraxe… Son un cúmulo de emocións que fan que nos sintamos fráxiles, pero non esquezas unha cousa: sodes moi grandes, sodes valentes, sodes excepcionais e grandes profesionais. Non estades soas. Soñamos xuntas e enfocamos as enerxías cara ao mesmo obxectivo, seguimos adiante polo mesmo camiño.

Desde Sant Lluís enviámosvos apertas, bicos e ánimos cos que encher a alma de virtudes que poñen a pel de galiña para seguir con esta loita interminable. Os compañeiros da Residencia Xeriátrica e Centro de Día de Sant Lluís a todas as profesionais do Xeriátrico de Es Mercadal, así como aos e ás residentes e aos seus familiares.

Orgullo

E compartimos tamén o sentimento dun profesional de Hestia Alliance tras visualizar un dos moitos vídeos que se comparten estes días nas redes sociais, o de Hollister, un dos nosos provedores. 

“Un amigo envioume hoxe unha mensaxe de apoio para todos os sanitarios (grazas, Rafa), con moita carga emocional, ou así sentino eu. O certo é que levo todo o día pensando na devandita mensaxe e non podo máis que sentirme orgulloso de ser sanitario, no meu caso enfermeiro. Nuns tempos tan convulsos e de moi difícil manexo, Hestia Alliance, a través de todos os seus traballadores –sanitarios e non sanitarios–, está en primeira liña, redobrando esforzos para cubrir as necesidades que a sociedade nos demanda. Non podo máis que darvos as grazas polo voso compromiso, dedicación e tesón, claves para que pacientes, usuarios e familiares se sintan atendidos e acompañados agora e sempre. Todos os ánimos e un forte abrazo”.