Clínica Coroleu asiste á entrega dos XXIV Premios de Debuxo Agustí de Semir & Conxa Millán

22 Nov Clínica Coroleu asiste á entrega dos XXIV Premios de Debuxo Agustí de Semir & Conxa Millán

O salón de actos de CaixaForum, en Barcelona, acolleu o pasado martes 24 de outubro o acto de entrega dos XXIV Premios de Debuxo Agustí de Semir & Conxa Millán, promovidos pola Fundación Dr. Fábregas. Seis persoas usuarias de Clínica Coroleu asistiron ao acto, xunto con numerosos participantes do concurso, que este ano tiña como temática o soño.

«Puidemos gozar das obras de debuxo premiadas e dunha gala con actuacións musicais e teatrais ateigadas de mensaxes e reivindicacións para dar voz á saúde mental e ás experiencias en primeira persoa», explican desde o equipo de Animación Sociocultural do centro que Hestia Alliance xestiona no barrio barcelonés de Sant Andreu.

Malia que non obtiveron ningún premio, as asistentes estiveron moi contentas de ver recoñecida a súa participación no concurso e de poder asistir ao evento, realizando así unha actividade diferente fóra de Clínica Coroleu. E Nonna Arnau, socioanimadora do centro, tamén salientaba o duplo valor desta actividade.

«É importante participar en iniciativas como o concurso porque dá a oportunidade de expresar a través da arte o que ás veces é difícil de expresar con palabras, mantenos activos e, ao mesmo tempo, dálle visibilidade á saúde mental, algo crucial para ir acabando paseniñamente co estigma e fomentar a inclusión», explicaba.

A profesional de Clínica Coroleu apunta, ademais, que «tamén o feito de poder ir á entrega de premios é un recoñecemento á súa participación e unha gran motivación, especialmente para aqueles que están internos nunha clínica ou servizo de saúde mental, xa que significa saír, ter contacto coa comunidade e tamén coñecer espazos e recursos da cidade».

Actividades na propia contorna

Clínica Coroleu, do mesmo xeito que o resto dos centros do Grupo Hestia Alliance, aproveita a contorna para realizar diferentes actividades que complementan o proceso terapéutico dos seus pacientes e usuarios, contribuíndo a mellorar a súa autonomía e calidade de vida.

Visitas a monumentos e museos, terapia asistida con animais, ioga, flashmob, debuxo ou marcha nórdica son algunhas das propostas que o centro barcelonés, especializado en saúde mental, implementou da man dos seus profesionais, obtendo boa resposta por parte dos pacientes.